Tommaso Campanella, De sensu rerum, p. 8
Caput IV.
Sensum esse perceptionem passionis cum discursu rei
existentis
actu; et non potentiae purae informationem;
eiusque diffentiae.
~ Videtur sensus passio esse. Cum enim calorem aut frigus
sentio, calidus
frigidusve fio. Non autem sentiuntur, nisi
potentes sint ad movendum, agendumque.
Febricitans quidem
medici manus calorem non sentit, ut ego, quoniam non
patitur
maior calor a minori: et qui aeque calidum tangit, non sentit
calorem; ergo
sentimus, quando patimur et punctionem dum pungimur,
et dulcedinem, dum dulcescimus,
et odorem dum afficit nares; et
colorem dum disgregat aut congregat visum; Sensus
ergo passio, alteratioque
est. Sed bifariam: Nam sensibile aut delectat, aut
displicet,
aut non ita validam infert passionem, quae dolorifica, aut
voluptuosa
sit, sed consuetam. Illae nos delectant res, quae Symmetriam
nostri
sensus in talibus organis taliter concinnatam conservant. Idcirco
blandus
calor nostro similis delectat; displicent autem quae destruunt,
ut ferrum ignitum.
Ita et omnia obiecta etiam sensuum interiorum, si
utilia sunt conservationi,
placent, si noxia displicent. Sensus ergo non
est sola passio perfectiva, ut Aristot. putat: sed etiam corruptiva.
Porro cum quid sentimus, non totam illius vim et
formam suscipimus;
patet cum lapidem videmus. Ipse enim non potest se propria
spoliare
forma, nec qui spoliet, extat: sed lux resiliens eius tincta facie intrat
in
oculum, tangit spiritum, afficitque facie lapidis, qua et ipsa lux est
affecta:
Sicque spiritus sentit non quidem lapidis informatus forma, nam
lapis
fieret. Sensus itaque non fit per informationem, sicut Aristoteli
videtur, sed per immutationem. Per informationem enim fieret
totalis
destructio formae praecedentis, et introductio alterius. Tunc ergo
ignem
et solem cognosco, quando ab illis immutor, sed non omnino: nam
fierem
ignis: sed parum: et ex illa parva paucaque immutatione virtus
sentiens mensurat
reliquum potentiae ignis, et ex aliis experimentis
in aliis rebus combustis
validissima simul esse argumentatur. Sensus
igitur non solum passio est, sed ex
illata passione inferentis obiecti
perceptio notionalis: et fit simul cum discursu
tam celeri, quod non percipitur.
Totum enim ignem ex parte caloris, vel lucis
percipere syllogismus
est. Porro cum videmus, quae alias vidimus, vel quid
persimile, subito idem
patimur. Sicut cum festum celebrari intuemur, alterius festi
reminiscimur,